காற்றின் நிழல்

நீச்சல் தெரியாதவனை

குதியெனச் சொல்லிவிட்டு

மூழ்கி மூழ்கி

மொத்தமாக மேலே போகும் முன்

மூன்று முறை மேல்வருவாய் 

காப்பாற்றிவிடுவேன் என

கடும் நீச்சல் கற்றுக்கொடுக்க

படியிறங்கி வரும் என்  அய்யா !

எக்கணமும் சிக்கனம் தேவை

நமக்குத் தெரிஞ்சவங்களுக்கு

நல்லது கெட்டதென்றால்

நாம துணை நிக்கனுமென

வழிநடத்துன

அய்யாவின்

நேரடித் தம்பி, சின்னய்யா !

யாருக்கு எங்க பொண்ணு பிறந்திருக்கும்

இந்தப் பொண்ணுக்கு அந்த மாப்பிள்ளையென

காலமெல்லாம் யோசிச்சு

எனக்கும் பார்த்து வைச்ச

சின்ன சிற்றப்பா!

தன் மகளை

உன் தாரமென

தாரை வார்த்த தந்தை !

விவசாயி நெல்லையும் விதைக்கலாம்

கதையையும் விதைக்கலாமென

என் நெஞ்சில்

இலக்கியம் வளர்த்த தந்தை கி.ரா.

தமிழை வளர்க்க

 நல்லொளி ஏற்ற

என்னை வழி நடத்தும்

அ. முத்துலிங்கம்

தந்தைகள்

ஆமாம்

என் வழி நெடுக தந்தைகள் !